Göz sulanması və onun səbəbləri

16 Ocak 2022
2 402
0
Göz sulanması və onun səbəbləri
Havaların stabil keçməməsi bəzi narahatlıqlara səbəb olur və onlardan biri də göz sulanmasıdır. Yol gedərkən sanki ağlayan adam təsiri bağışlayanlar göz sulanmalarını külək və soyuq hava ilə əlaqələndirir, bəzən isə bunu qripin əlaməti hesab edirlər. Əslində isə göz sulanmasının səbəbini yalnız fəsil və soyuqlarla bağlamaq düzgün deyil.

Feat.Az
AZƏRTAC-a istinadən bildirir ki, paytaxtın baş oftalmoloqu Sevda Bəşirova deyib: "Göz yaşı orqanizm üçün çox vacib mayedir, onun tərkibində lazımi qədər komponent birləşdikdə qoruyucu təbəqə əmələ gətirərək gözü toz və hava infeksiyalarından qoruyur. Göz yaşları üç yerə bölünür. Birinci tipə emosiyalardan yaranan, sevinəndə, yaxud kədərlənəndə ifraz olunan göz yaşları, ikinci tipə güclü işıq, doğranan soğan və s.-dən yaranan refleks göz yaşları, üçüncü tipə toz, yaxud yad cisimlə təmas zamanı yaranan və qısa zamanda quruyan bazal göz yaşları aid edilir. Həmin səbəblərdən olmayan və daim narahatlıq yaradan göz yaşları isə gözlərdə olan problemin xəbərçisi ola bilər.

Göz yaşının axmasının səbəbi emosional hallar və yaxud gözə yad cismin düşməsi deyilsə, həmçinin gözdən yaş axması narahatlıq törədirsə, bu, ya göz yaşının artıq əmələ gəlməsi, ya da onun axıb burun boşluğuna tökülməsini təmin edən kanalın tutulması ilə əlaqədardır. Göz yaşı kanalının tutulmasının səbəbi iltihabi və mexanikidir. İltihabi olduqda gözə qış aylarında əlcəklər, çirkli əllər və yaxud əl dəsmalından mikrob düşərək sulanmaya səbəb olur. Göz qapaqlarında olan əyrilik isə mexaniki səbəblərə aiddir. Göz qapaqlarının bütün tərəflərdən uclarında kiçik nöqtələr var və onlar suyun çəkilməsinə kömək edir. Göz qapaqları çölə doğru olduqda həmin nöqtələr suyu yox, havanı çəkməyə başlayır. Göz qapağının anormallığı göz yaşlarının çoxluğuna səbəb ola bilər".

Göz sulanması narahatlıqlarından birinin də gözlərin yaxşı görməməsi olduğunu söyləyən həkim-oftalmoloq deyib: "Su ilə dolu gözlər hər şeyi lupa ilə böyüdülmüş kimi görür. Daim salfetlərlə gözlərin silinməsi refleks olaraq göz yaşlarının daha da artmasına səbəb olur. Mikrobların gözə keçmə ehtimalı da var. Soyuq və küləkli havada gəzərkən göz yaşı axarında artım olur. Soyuq hava göz yaşı çox olanlarda yaş artırır, normal gözlərə isə ağladacaq qədər təsir etmir. Göz sulanması varsa, əvvəlcə həkimə müraciət etmək lazımdır. Birinci halda gözdə zəifləmə, göz kanallarının daralması, yaxud gözdə qlaukoma yaranır və göz sulanması ilə müşahidə olunur. İkinci halda gözdə heç bir zəifləmə və narahatlıq olmur, gözdə sulanma varsa, onun səbəbi kompüter, mobil telefon və şiddətli işıqdır.

Gözlərdə sulanma, quruluq, yanma, batma, qızarma, qaşınma kimi narahatlıqların yaranmasında şüalı alətlərin rolu danılmazdır. Sulanmanın səbəbi araşdırılarkən gözlərdə heç bir xəstəlik faktoru aşkar edilməzsə, onda gözlərə ən çox zərər verən kompüter və telefonlardır. On il əvvəllə müqayisədə indi eynək taxan gənclər xeyli çoxalıb. Optik linzadan istifadə edənlər də eynəyə keçsə, onda eynək taxanlar daha çox olar. Gözlərə istirahət verilmədikdə, 5 saatdan çox kompüter arxasında, qalan saatları isə telefon ekranı ilə keçirəndə gözlərdə narahatlıq yaranır.

Xəstəlik olmasa da, sulanan gözləri problemdən qurtarmaq üçün onlara istirahət vermək lazımdır. Televizor, kompüter və mobil telefondan həddindən çox istifadə edilməsi gözlərin normadan artıq qırpılmasına, bu da gözdə quruluğa və ilkin mərhələdə kompensator olaraq sulanmaya səbəb olur. Bunun qarşısını almaq üçün kompüter arxasında uzunmüddətli iş və ya televizora baxarkən ekranın işıqlanmasını minimuma endirmək, gözləri tez-tez qırpmaq, iş qurtarandan sonra yumub onlara bir neçə dəqiqə istirahət vermək, təbii göz yaşı damcılarından istifadə etmək lazımdır.

Həkim məsləhəti olmadan apteklərdə satılan göz yaşı damcılarından istifadə etmək yolverilməzdir, çünki gözdəki sulanmanın səbəbini aşkar etməyincə həmin damcılardan özbaşına istifadə edilməsi problemin daha da artmasına səbəb ola bilər. Göz damcıları fərqlidir: quru gözlər, zəif gözlər, infeksiyaların qarşısını almaq üçün və s. Yanlış tətbiq olunan göz yaşı damlası əlavə problem yarada bilər. Ona görə də həkim-oftalmoloqun məsləhəti olmadan gözə müdaxilə etmək olmaz.

Gözlərin güclü olması isə qidadan birbaşa asılıdır. Normal qidalanma və vitaminlər qəbul etmək gözlərin sonradan yaranan zəifliyin qarşısını almaqla yanaşı onların daha sağlam olmasına imkan yaradır".
Əvvəlki Xəbər
RƏY ƏLAVƏ ET
Bilgilendirme
Yorum Ekleyebilmeniz için Sitemize Kayıt Olmanız Gerekmektedir.