Sən Mənim üçün ölüsən!

Qəbiristanlıqdan qayıdırıq.
Mən, kədər və ümüd.
Sizi basdırdıq.
Səni, Sevgini və arzuları.
Səni Mən basdırdım.
Sevgini kədər, arzuları isə ümüd basdırdı.
Bu gündən, Sən Mənim üçün ölüsən!
Həmişəlik ölmüsən.
Özün ölməyin azmış kimi, sevgimlə arzularımı da öldürmüsən.
Qəbrinizi dırnaqlarımla qazıdım, əllərimlə torpaqladım.
Başdaşı yerinə qəbrinizə ümüdün mənə verdiyi üç gülü əkdim.
Bitməyəcəyini bilsəm də...
Sonra doyunca ağladım.
Ruhunuz şad olsun deyə yox, gülləri sulamaq üçün.

Qəbiristanlıqdan qayıdırıq, Mən, kədər və ümüd.
Ehsanınızı kədər verdi, təsəllini isə ümüd...

Sabah, kədəri içki şüşələrində basdıracağam, ümüdü isə ürəyimdə.
Bəs məni kim basdıracaq?!