Lüzumsuzdur yaşamaq

Tənha evin bir küncünə qısılıb.
Xatirələr qırıntısı səpərsən,
Hərdən onun ətri gələn yastığı,
Qucaqlayıb miskin-miskin öpərsən...
Kədər gəlib tez-tez səni yoxlayar,
Bir cüt öpüş dəfn olunar yanağda.
Xatirələr ürəyini oxlayar,
Neçə gülüş lal dayanar dodağda...
Külək əsər,küçələri dağıdar,
Külək əsər,dərdi-səri dağıtmaz.
Xəyal dönər gözlərinə qayıdar,
Ancaq özü birdə geri qayıtmaz...
Hər küçədə bir xatirə, min dilək.
Ögey baxar o küçələr,səkilər .
Ağ saçların payız vuran budaqtək,
Çiyinlərə yarpaq-yarpaq tökülər...