-` Heç Kəsim yoxdur
Mən dərin bir sükutdan,
səsə-küyə düşmüşəm.
Bu küydən sənin səsin
gələr deyə düşmüşəm.
Mən seçərəm səsini
milyon səsin içindən.
Qızınmışam o ətrin,
o nəsəfin içində.
Yox, mən unutmamışam,
səsin qulağımdadır.
Nəfəsin saçlarımda,
ətrin qucağımdadır.
Gah göydən, yerdən səni
soraqlayır əllərim.
Gah gülür sən gedəli,
gah ağlayır əllərim.
Mənə tanış deyildi
bu acı ayrılıqlar.
Elə ədəblidir ki,
qapı döyür intizar.
Səndən etibarlıdır,
məni axtarır kədər.
Sən məni sevməmişdin
dərdin sevdiyi qədər.
İndi pozub sükutu,
düşmüşəm hay-haraya!
Sən o doğma səsləri
aparmısan haraya?
Donuram, qızınmağa
ətrin, nəfəsin yoxdur.
Milyon kəsim olsa da,
sənsiz heç kəsim yoxdur.
