Mən hara gedim ki, sən olmayasan?
İnan ki yadımda, hər halın qalıb.
O qədər cavabsız, sualın qalıb.
Sən özün getmisən, xəyalın qalıb.
Mən hara gedim ki, sən olmayasan?
Mən nəyə baxıram, səni görürəm.
Özgəyə baxıram, səni görürəm.
Güzgüyə baxıram, səni görürəm,
Mən hara gedim ki, sən olmayasan?
Nə olar görünmə daha gözemə!
Nə gəlmə arxamca, düşmə izimə!
Başqa bir dünyamı tapım özümə?
Mən hara gedim ki, sən olmayasan?
Sən axı yerimi hardan bilirsən?
Uzaqdan halıma, baxıb gülürsən,
Yuxuya gedirəm, yenə gəlirsən.
Mən hara gedim ki sən olmayasan?
