2015: Bu il Azərbaycanda nələr baş verdi?
Artıq yavaş-yavaş 2015-ci ilin sonuna gəlirik. İstər dünyada, istərsə də Azərbaycanda bu il xeyli sayda hadisə baş verdi.Yeni il yaxınlaşdıqca ötən ildə baş verənlərlə bağlı yazı seriyaları hazırlamağa qərar verdik. İl ərzində incəsənətdən tutmuş, idmana, siyasətdən tutmuş müharibələrə qədər həm ölkəmizdə, həm də dünyada baş verənləri xatırlamaq və qısaca geriyə baxmaq üçün dekabr ərzində yazılar təqdim edəcək. Bu gün isə Azərbaycanda 2015-ci ildə baş vermiş əsas hadisələrlə başlayırıq.
21 fevral: Manatın ucuzlaşması
Keçən ildən başlayaraq neftin uçuzlaşmasının Azərbaycana da təsir edəcəyini hər kəs gözləyirdi. Bu ilin əvvəlində Milli Bankın devalyasiyaya etmə qərarı hər kəsdə şok yaratmasıyla bərabər, gündəlik həyatımızda və sosial şəbəkələrdə ən çox müzakirə etdiyimiz mövzulardan biri idi. Qəbul edilən qərara əsasən dolların məzənnəsi 1 manat 5 qəpik səviyyəsində, Avronun məzənnəsi 1 manat 19 qəpik, Rublun manata nisbətən məzənnəsi isə 0,013 manatdan 0,017 manatadək artmışdı.
28 fevral: Bobbi Makferrinin konserti
Bakının konsert zalları da maraqlı hadisələrə ev sahibliyi etdi. Don`t Worry, Be Happy” mahnısı ilə milyonların qəlbini fəth edən Bobbi Makferri Bakıda konsertlə çıxış etdi. On dəfə “Grammy” laureatı alan Bobbi peşəkarlar arasında maraqlı və rəngarəng vokalist kimi tanınır. O, pop musiqi ilə yanaşı, caz və klassik musiqiləri də gözəl ifa edir.
19 may: Binəqədi yanğını
May ayında Bakının Binəqədi rayonunda çoxmərtəbəli binada baş verən yanğında 15 nəfər vəfat etmiş, 50-dən çox insan isə yaralanmışdı. Yanğının səbəbi olaraq binalarda üzlük olaraq istifadə edilən penoplast idi. Hər kəsin çox təsirləndiyi bu dəhşətli hadisədən sonra, Bakıda 283 yaşayış binasında bu materialdan istifadə olunması əhali tərəfindən narahatçılığa səbəb oldu və yay ərzində icra hakimiyyətləri həmin binaları başqa üzlüklərlə dəyişdirdi.
12 iyun – 28 iyun: Avropa Oyunları
Olimpiya Komitəsi tərəfindən yaradılan və ilk dəfə Bakıda keçirilən idman oyunları iki həftə davam etdi. Oyunlarda 50 ölkədən 20 idman növü üzrə 6000-dən çox idmançı yarışdı. Avropanın fərqli ölkələrindən gələn idmançılar bu oyunlar üçün inşa olunan idman zallarında və Olimpiya stadionunda yarışdılar.
Avropa oyunlarının sdownloadimvolu nar və ceyrandan ibarət idi. Bu maskotlar da sosial mediada xeyli müzakirə edildi.
Ancaq Avropa Oyunları sadəcə idman hadisəsi kimi müzakirə olunmadı. Universitet tələbələrinin könüllü olaraq cəlb olunması, daha yaxşı təşkilatçılıq iddiası ilə qoyulan qadağalar və neftin ucuzlaşdığı dövrdə bu qədər böyük büdcəli tədbirin keçirilməsi cəmiyyətdə birmənalı olaraq qarşılanmadı.
11 avqust: Göygöl istirahətə açıldı
Yayın sonlarına doğru Azərbaycanın ən mənzərəli yerlərinin başında gələn Göygölün girişinə qoyulan məhdudiyyətlər uzun illərdən sonra aradan qaldırıldı. 2008-ci ildə ekoloji təmizlik və infrastrukturun yenilənməsi məqsədilə bağlanan Göygöl nəhayət bu il yenidən xalqın istirahətinə açılıb. Gəncədən xüsusi avtobusların gedəcəyi Göygöl il ərzində insanların axınına məruz qalıb.
3 oktyabr: Baku Bus
Bu il nəqliyyat sistemində də vərdişlərimizi dəyişdirəcək yenilik baş verdi. İlk əvvəl, həm metro,həm də avtobuslarda işlədilə bilən BakıKart’dan sonra, kartla işləyən qırmızı BakuBus Bakı kütləvi nəqliyyatında yenilik idi. Bundan əlavə, uzun müddət hər kəsin gözlədiyi Hava Limanından 28 may və Koroğlu metrosuna birbaşa gələn avotbus xəttinin açılması da bu il baş verdi.
1 noyabr: Parlament seçkiləri
2015-ci il siyasət səhnəsində də önəmli il hesab edilirdi. Payızda Milli Məclisin növbəti çağırışı üçün seçkilər keçirildi. Ancaq İctimai Televiziyada seçki debatlarının olmaması və müxalifətin aktiv iştirak etməməsi daha sakit keçməsinə səbəb oldu. Seçkilər zamanı baş verən pozuntular da cəmiyyətdə geniş müzakirə edildi.
26 noyabr: Nardaran hadisələri
26 noyabr 2015-ci ildə Bakının Nardaran qəsəbəsində baş vermiş, 7 nəfərin ölümü, 4 nəfərin yaralanması və 14 nəfərin həbs olunması ilə nəticələnən qarşıdurma ilin ən “isti” hadisələri biri oldu. Həlak olanlardan 2-si DİN-nin əməkdaşı, digər 5 nəfər isə qəsəbə sakinləri olmuşdur. Hadisədən sonra Nardaranlılar qəsəbədə etiraz aksiyası keçirsə də, hələ də narazılıq tam yatışdırılmış hesab edilə bilməz.
4 dekabr: Günəşli yatağında yanğın
2015-ci ilin bir başqa kədərli xəbəri isə Xəzər Dənizindən gəldi. Ötən həftə güclü küləyin təsiri ilə zədə alan qaz boruları platformada irimiqyaslı yanğının çıxmasına səbəb oldu. Xilasedici vertolyotlar və gəmilərin platformaya yaxınlaşa bilmədiyinə görə işçilər qayıqla uzaqlaşmağa çalışması yanğını faciəyə çevirdi və qayıqlardan biri güclü dalğaların təsiri ilə çevrilərək, 32 nəfərin ölümünə səbəb oldu.
Pahoo.az