Ayrıldınızsa, unudun!

Münasibətlərə son qoymaq hər zaman çətin olur. Lakin eyni məktəbdə və ya universitetdə oxuyursunuzsa, bu ikiqat qəlizləşir. Çünki həmin təhsil ocağından məzun olanadək onunla hər gün qarşılaşmağa məcbursunuz. Bir münasibət bitdiyi zaman "gecələr boyunca ağlayıb, sızlamaq ən asanıdır” deyə düşünürsünüzsə, diqqətlə oxuyun. Ayrıldıqdan sonra (onunla hər gün qarşılaşmaq məcburiyyətində qalsanız belə) sizə unutmağın bir neçə yolunu təqdim edəcəyəm. Onu unutmağa çalışın və hər şeyın öz qaydasında olduğunu hiss etdirin. Belə edin ki, kədərlənən və peşman olan o olsun, siz yox!

1. Rəfiqələrinizlə əylənin
Sevgilinizi unutmağın və ayrılığın verdiyi kədərdən xilas olmağın ən asan yolu rəfiqələrinizlə əylənmək və dərdləşməkdir. Bütün gecəni musiqi dinləyib səhərədək əylənmək, rəqs etmək də keçmişi unutmağa kömək edir. Rəfiqələriniz sizi xoşbəxt görmək istədikləri üçün bu təklifinizə könüllü razılıq verəcəklər. Ayrıldınız deyə dünyanın sonu gəlmədi ki?! Xoşbəxt olmaq üçün hələ qarşıda bir ömür var.

2. Dərslərinizə və ev tapşırıqlarınıza daha çox vaxt ayırın.
Sevgilinizə ayırdığınız vaxta görə dərslərinizi zəif oxumuş ola bilərsiniz. Məhz bu baxımdan indi dərslərinizə geniş vaxt ayırmağınız lazımdır. Bu, ayrılığı unutmaq üçün ən gözəl vasitələrdəndir. Çünki beyin məşğul olduğu müddətcə sevgi yada düşmür.

3. Özünüzə zaman ayırın.
Ayrıldıqdan sonra kədərlənməyin. Bir dəqiqəlik dayanın! Bu münasibətin bitməsində tək səbəbkar siz deyilsiniz. O da ən az sizin qədər günahkardır. Ona görə peşman olub ağlamağı bir kənara qoyun və özünüzə vaxt ayırın. Gün ərzində yalnız qidanıza, geyiminizə, fitness və ya qaçışa vaxt ayırın. Bekar olduğunuz bu gözəl vaxtı dəyərləndirin. Artıq yalnız özünüz üçün yaşamalısınız. Özünüzə dəyər verin və hər saniyəni dəyərləndirin.

4. Yeni məkan seçin.
Məktəb və ya universitetdə onunla birlikdə əyləşdiyiniz məkanlardan uzaq durun. Məktəbin və ya universitetin başqa məkanları da var. Onları axtarıb dəyərləndirin. Köhnə məkanlar sizə çox şeyi xatırladacağı üçün kədərlənə bilərsiniz. Yeni məkanda isə yalnız yeniliklərə meyilli olacaqsınız. Eyni məkana getmək məcburiyyətində qalsanız belə, hər şeyə başqa gözlə, başqa səbəblə baxa bilərsiniz.

5. Dünyada olan tək oğlan o deyil.
Heç bir zaman yoldan keçən biri ilə sevgili olmağı ağlınıza gətirməyin. Lakin unutmayın ki, dünyada var olan tək oğlan o deyil. Əmin olun ki, ətrafınızda sizə baxan başqa gənclər də var. Sizdən xoşu gələn və sizinlə ünsiyyət qura bilmək üçün hər anı dəyərləndirənlər vardır. Onda niyə hələ də köhnə sevgilinizi düşünüb kədərlənəsiniz ki? Onu keçmişdə qoy və o gündəliyi bağlı hesab et.

6. Zaman keçdikcə yetkinləşirsiniz.
Bəzi insanlar var ki öz ruh ekizlərinə məhz universitet illərində rastladıqlarını qeyd edirlər. Lakin hər zaman haqlı olmurlar. Çünki məktəb illərində insanın özünü tanıması universitet illərindəkindən fərqlənir. Eləcə də universitet illəri başa çatdıqdan sonra ötən illərin təsirindən yetkinləşmə prosesi baş verir. İnsan sözün əsl mənasında böyüyür. Bu həqiqətləri bildiyiniz müddət boyunca sevgilinizi asanlıqla unuda biləcəksiniz. Yeni gün yeni həyat deməkdir. Yeni həyat yeni bilgi, yeni tanışlıq, yeni münasibətdir.

7. Onu təqib etməyin.
Ayrılığın və xatirələrin öhdəsindən gəlməyin ən yaxşı yolu onu təqib etməməkdir. Nə etmək istəyirsə etsin, nə danışırsa, danışsın. Hansı məkanlara gedirsə, getsin. Onu təqib etmədiyinizi anlayanda və dostlar siyahısından çıxardığınızı biləndə peşman olan tərəf o olacaq. Onu artıq unutmuş kimi davranın və həyatınıza qaldığınız yerdən davam edin. Onu görməməyə çalışın və inanın mənə, tədricən unutmuş olacaqsınız.