Son görüş
İkimiz də bilirdik ki, gedirsən,
Bəs niyə mən səni yola salmadım.
Ayrılığın sonu yoxdur, bilirsən,
Necə də bivecəm, vecə almadım.
Gözlərində bulanmışdı inci su,
Artıq ölüb xəyalları, arzusu.
İlahi mələyi qapını pusur...
Qəlbim söylədi qal, amma qalmadım.
Oxşadım əlini, gəlmədi kara,
Sanki sığal çəkdim mən buza, qara.
Seçdiyin yol görən aparır hara?
Bunu nə sən bildin, nə mən anladım.
Böyük zövq alsaq da hər gözəl andan,
Həyat ötüb keçir qısa zamanda.
Məni çağırsan da, çağırmasan da,
Qoşa qalacaqdır, adınla, adım.