....həyatla ölümün arasında mən

Bir qəlbi sınığın qəlbi kimiyəm
xəbis ürəklərə qəlpə kimiyəm
indiki halımda körpü kimiyəm
həyatla ölümün arasında mən.

yenə də üzümə gülərkən ilham,
dərd də gülümsədi azca bu axşam.
oynaya-oynaya oyun olmuşam,
iki təbəssümün arasında mən.

taleyim üzümə güləcək bəyəm,
sevginin,həsrətin əlində nəyəm?
hər zaman üzmüşəm və üzməkdəyəm,
bu üç təlatümün arasında mən.

bir tanrı şahiddir nələr çəkmişəm,
xeyir gözləsəm də zərər çəkmişəm.
səni sevməməkçin çəpər çəkmişəm,
gözümlə könlümün arasında mən.