Banklar əhaliyə 98 milyon manat ipoteka krediti veriblər
Mərkəzi Bank məlumat yaydı.
Banklar tərəfindən verilmiş ipoteka kreditlərinin həcmi 2015-ci il yanvarın 1-nə olan məlumata görə, 97,1 milyon manat təşkil edib. Ötən ilin dekabr ayında isə bu göstərici 88,6 milyon manat idi. Bu da 2013-cü illə müqayisədə 14% azdır.
Azərbaycan Mərkəzi Bankın yanında fəaliyyət göstərən Azərbaycan İpoteka Fondunun (AİF) tərəfindən verilən kreditlərin orta faiz dərəcəsi isə 2015-ci il yanvarın 1-nə olan məlumata görə, 6,79% təşkil edib. Qeyd edək ki, bu göstərici oktyabr ayında 6,82%, noyabr ayında isə 6,81% idi.
AİF-in xətti ilə maliyyələşdirməyə başlanandan 636 milyon manat dəyərində, o cümlədən 2013-cü ildə 112,9 milyon manat, 2012-ci ildə 74,77 milyon manat, 2011-ci ildə 95,64 milyon manat, 2010-cu ildə 97,08 milyon manat, 2009-cu ildə 76,9 milyon manat, 2007-ci ildə 70,2 milyon manat, 2006-cı ildə isə 5,6 milyon manat ipoteka krediti ayrılıb.
2014-cü il ərzində bankların əvvəllər ayırdığı kreditlərin yenidən maliyyələşməsinin ümumi həcmi 126,4 milyon manat təşkil edib.
Qeyd edək ki, dövlət büdcəsindən AİF-ə ayrılmış vəsait, ötən ilin sentyabr ayında 20 milyon manat olsa da, oktyabr, noyabr, dekabr aylarında isə dövlət büdcəsindən İpoteka Fonduna vəsait ayrılmayıb.