Gecələr rəhmət xəzinəsidir
Əgər gecələr olmasaydı, insanlar hərislikdən, tamahdan çırpınar, yanıb-yaxılardılar. O vaxt hər kəs artıq qazanc sevdasına düşər, çox qazanc əldə etmək üçün bədənlərini çox yorar, yandırıb-yaxardılar. Məhz buna görədir ki, xalqı az bir zaman üçün də olsa hərislikdən qurtarmaq üçün gecə rəhmət xəzinəsi kimi gəlib-çatar. Ey Haqq yolçusu! Sənə bir iç sıxıntısı gəlirsə, bil ki, bu hal sənin xeyrinədir. Kədərlənmə, məyus olma! Çünki sən rahatlıq halında ikən varını-yoxunu xərcləyirsən, bu xərcin əvəzində bir gəlir lazımdır. Dünyada daima yay mövsümü hökm sürsəydi, bağlara, bağçalara, daima günəşin istiliyi vursaydı, bağlarda və bağçalardakı bitkiləri kökündən elə yandırardı ki, onlar bir daha təzələnib torpaqdan baş qaldıra bilməzdilər. Qara qış qaşqabaqlıdır, lakin şəfqətlidir, mərhəmətlidir. Halbuki yay gülərüzlüdür, lakin yandırıcıdır, qovurucudur.
