Şokoladlı-almalı əlüstü piroq

Tərkibi (6-8 pay):

500 q alma (3 ədəd)
300 q un
100 q acı kakao tozu
200 q şəkər tozu
100 ml süd
3 yumurta
10 q qabartma tozu
220 q kərə yağı
formanı yağlamaq üçün 20 q kərə yağı
piroqun üzərinə səpmək üçün şəkər pudrası

Sobanı 190 dərəcə qızdırın. 26 sm diametrli formanı kərə yağı ilə yağlayın.

Un, qabartma tozu və kakaonu birlikdə ələyin.

Almaları yuyun, təmizləyin, sürtgəcin iri gözündən keçirin.

Kərə yağını vam odda əridib soyudun.

Yumurtaları qatı köpük alınınca çalın (miksersiz). Buraya süd, şəkər tozu, sürtgəcdən keçirdiyiniz alma, kakao-un-qabartma tozu qarışığı və kərə yağını əlavə edib yaxşı qarışdırın, xəmiri formaya tökün.

Sobada təxminən 1 saat bişirin. Artıq bişirməyin. Bişib-bişmədiyini kibrit çöpü ilə yoxlayın.
Soyudun. Formadan çıxarın, üzərinə şəkər pudrası səpin.

Nuş olsun!